Birth of John the Baptist Foretold

Luke 1

⁵ כהן היה בימי הורדוס מלך יהודה זכריה שמו ממשמרת אביה ולו אשה מבנות אהרן ושמה אלישבע׃ ⁶ ושניהם היו צדיקים לפני האלהים והלכי תם בכל מצות יהוה ובחקתיו׃ ⁷ ולא היה להם ילד כי אלישבע עקרה ושניהם באו בימים׃

⁸ ויהי היום ויכהן לפני אלהים בסדר משמרתו׃ ⁹ וכמשפט עבודת הכהנים יצא גורלו להקטיר קטרת ויבא אל היכל יהוה׃ ¹⁰ וכל קהל העם היו מתפללים בחוץ בעת הקטרת׃ ¹¹ וירא אליו מלאך יהוה עמד לימין מזבח הקטרת׃ ¹² ויבהל זכריה בראותו אתו ואימה נפלה עליו׃ ¹³ ויאמר אליו המלאך אל תירא זכריהו כי נשמעה תפלתך ואלישבע אשתך תלד לך בן וקראת שמו יוחנן׃ ¹⁴ והיה לך לשמחה וגיל ורבים ישמחו בהולדו׃ ¹⁵ כי גדול יהיה לפני יהוה ויין ושכר לא ישתה ורוח הקדש ימלא בעודנו בבטן אמו׃ ¹⁶ ורבים מבני ישראל ישיב אל יהוה אלהיהם׃ ¹⁷ והוא ילך לפניו ברוח אליהו ובגבורתו להשיב את לב אבות על בנים ואת הסוררים לתבונת הצדיקים להעמיד ליהוה עם מתקן׃

¹⁸ ויאמר זכריה אל המלאך במה אדע זאת כי אני זקנתי ואשתי באה בימים׃ ¹⁹ ויען המלאך ויאמר אליו אני גבריאל העומד לפני האלהים ושלוח אנכי לדבר אליך ולבשרך את זאת׃ ²⁰ והנה תאלם ולא תוכל לדבר עד היום אשר תהיה זאת תחת כי לא האמנת בדברי אשר ימלאו למועדם׃ ²¹ והעם היה מחכה לזכריה ויתמהו כי אחר בהיכל׃ ²² ויהי בצאתו לא יכל לדבר אליהם וידעו כי מראה ראה בהיכל וירמז להם ועודנו נאלם׃ ²³ ויהי כאשר מלאו ימי עבדתו וילך לו אל ביתו׃

²⁴ ויהי אחרי הימים האלה ותהר אלישבע אשתו ותתחבא חמשה חדשים ותאמר׃ ²⁵ ככה עשה לי יהוה בימי פקדו אותי לאסף את חרפתי בתוך בני אדם׃