The Visit of the Wise Men

Matthew 2

¹ ויהי כאשר נולד ישוע בבית לחם יהודה בימי הורדוס המלך ויבאו מגושים מארץ מזרח ירושלימה לאמר׃ ² איה מלך היהודים הנולד כי ראינו את כוכבו במזרח ונבא להשתחות לו׃ ³ ויהי כשמע הורדוס המלך את דבריהם ויבהל הוא וכל ירושלים עמו׃ ⁴ ויקהל את כל ראשי הכהנים וסופרי העם וידרש מאתם לאמר איפה יולד המשיח׃ ⁵ ויאמרו לו בבית לחם יהודה כי כן כתוב ביד הנביא׃

⁶ ואתה בית לחם ארץ יהודה אינך צעיר באלפי יהודה כי ממך יצא מושל אשר ירעה את עמי ישראל׃

⁷ אז קרא הורדוס למגושים בסתר ויחקר אתם לדעת עת הראות הכוכב׃ ⁸ וישלחם בית לחם ויאמר לכו חקרו היטב על דבר הילד והיה כי תמצאון אתו והגדתם לי ואבאה להשתחות לו גם אני׃ ⁹ ויהי כשמעם את דברי המלך וילכו והנה הכוכב אשר ראו במזרח דרך לפניהם עד באו אל מקום אשר שם הילד ויעמד ממעל לו׃ ¹⁰ ויראו את הכוכב וישמחו שמחה גדולה עד מאד׃ ¹¹ ויבאו הביתה וימצאו את הילד עם מרים אמו ויפל על פניהם וישתחוו לו ויפתחו את אוצרותם ויקריבו לו מנחה זהב ולבונה ומר׃ ¹² ויצוו בחלום לבלתי שוב אל הורדוס וילכו בדרך אחר אל ארצם׃