Josiah Reigns in Judah

2 Chronicles 34

¹ בן שמונה שנים יאשיהו במלכו ושלשים ואחת שנה מלך בירושלם׃ ² ויעש הישר בעיני יהוה וילך בדרכי דויד אביו ולא סר ימין ושמאול׃ ³ ובשמונה שנים למלכו והוא עודנו נער החל לדרוש לאלהי דויד אביו ובשתים עשרה שנה החל לטהר את יהודה וירושלם מן הבמות והאשרים והפסלים והמסכות׃ ⁴ וינתצו לפניו את מזבחות הבעלים והחמנים אשר למעלה מעליהם גדע והאשרים והפסלים והמסכות שבר והדק ויזרק על פני הקברים הזבחים להם׃ ⁵ ועצמות כהנים שרף על מזבחותים ויטהר את יהודה ואת ירושלם׃ ⁶ ובערי מנשה ואפרים ושמעון ועד נפתלי בהר בתיהם סביב׃ ⁷ וינתץ את המזבחות ואת האשרים והפסלים כתת להדק וכל החמנים גדע בכל ארץ ישראל וישב לירושלם׃