29 וילך ירבעל בן יואש וישב בביתו׃ 30 ולגדעון היו שבעים בנים יצאי ירכו כי נשים רבות היו לו׃ 31 ופילגשו אשר בשכם ילדה לו גם היא בן וישם את שמו אבימלך׃ 32 וימת גדעון בן יואש בשיבה טובה ויקבר בקבר יואש אביו בעפרה אבי העזרי׃
33 ויהי כאשר מת גדעון וישובו בני ישראל ויזנו אחרי הבעלים וישימו להם בעל ברית לאלהים׃ 34 ולא זכרו בני ישראל את יהוה אלהיהם המציל אותם מיד כל איביהם מסביב׃ 35 ולא עשו חסד עם בית ירבעל גדעון ככל הטובה אשר עשה עם ישראל׃