1 וידבר יהוה אל משה לאמר׃ 2 צו את בני ישראל ואמרת אלהם את קרבני לחמי לאשי ריח ניחחי תשמרו להקריב לי במועדו׃ 3 ואמרת להם זה האשה אשר תקריבו ליהוה כבשים בני שנה תמימם שנים ליום עלה תמיד׃ 4 את הכבש אחד תעשה בבקר ואת הכבש השני תעשה בין הערבים׃ 5 ועשירית האיפה סלת למנחה בלולה בשמן כתית רביעת ההין׃ 6 עלת תמיד העשיה בהר סיני לריח ניחח אשה ליהוה׃ 7 ונסכו רביעת ההין לכבש האחד בקדש הסך נסך שכר ליהוה׃ 8 ואת הכבש השני תעשה בין הערבים כמנחת הבקר וכנסכו תעשה אשה ריח ניחח ליהוה׃