A Life Pleasing to God

1 Thessalonians 4

¹ ועוד נבקשה מכם אחי ונזהיר אתכם באדנינו ישוע כי כאשר קבלתם מאתנו איך לכם להתהלך ולמצא חן בעיני האלהים כן תוסיפו וכן תרבו עוד׃ ² כי ידעתם את המצות אשר נתנו לכם בשם האדון ישוע׃ ³ כי רצון האלהים היא קדשתכם אשר תתרחקו מן הזנות׃ ⁴ וידע כל איש מכם לשמר את כליו בקדשה ויקר׃ ⁵ ולא בתאות זמה כדרך הגוים אשר אינם ידעים האלהים׃ ⁶ ולא יפרץ איש ויונה את אחיו בעשק כי נוקם יהוה על כל זאת כאשר כבר אמרנו והעידנו לכם׃ ⁷ כי לא קרא אותנו האלהים לטמאה כי אם לקדשה׃ ⁸ על כן הבוזה זאת לא אנשים הוא בוזה כי אם את האלהים אשר גם שם בקרבנו את רוח קדשו׃

⁹ ועל אהבת האחים אין צרך לכתב אליכם הלא אף אתם למודי יהוה לאהבה איש את רעהו׃ ¹⁰ וגם עשים אתם כן לכל אחיכם אשר בכל מקדוניא אך נבקשה מכם אחי אשר תוסיפו ותרבו עוד׃ ¹¹ ותשתדלו לשבת בנחת ותעשו איש מלאכתו בעמל ידיכם כאשר צוינו אתכם׃ ¹² למען תתנהגו כהגן עם אשר בחוץ ולא תצטרכו לאדם׃