17 ויבא ישוע וימצאהו זה ארבעה ימים שכב בקבר׃ 18 ובית היני היה קרוב לירושלים כדרך חמש עשרה ריס׃ 19 ורבים מן היהודים באו בית מרתא ומרים לנחם אתהן על אחיהן׃ 20 ויהי כשמע מרתא כי ישוע בא ותצא לקרתו ומרים יושבת בבית׃ 21 ותאמר מרתא אל ישוע אדני אלו היית פה כי אז לא מת אחי׃ 22 וגם עתה ידעתי כי כל אשר תשאל מאת אלהים יתן לך אלהים׃ 23 ויאמר אליה ישוע קום יקום אחיך׃ 24 ותאמר אליו מרתא ידעתי כי יקום בתקומה ביום האחרון׃ 25 ויאמר אליה ישוע אנכי התקומה והחיים המאמין בי יחיה גם כי ימות׃ 26 וכל החי אשר יאמין בי לא ימות לעולם התאמיני זאת׃ 27 ותאמר אליו כן אדני האמנתי כי אתה המשיח בן האלהים הבא לעולם׃