14 ואמר סלו סלו פנו דרך הרימו מכשול מדרך עמי׃ 15 כי כה אמר רם ונשא שכן עד וקדוש שמו מרום וקדוש אשכון ואת דכא ושפל רוח להחיות רוח שפלים ולהחיות לב נדכאים׃ 16 כי לא לעולם אריב ולא לנצח אקצוף כי רוח מלפני יעטוף ונשמות אני עשיתי׃ 17 בעון בצעו קצפתי ואכהו הסתר ואקצף וילך שובב בדרך לבו׃ 18 דרכיו ראיתי וארפאהו ואנחהו ואשלם נחמים לו ולאבליו׃ 19 בורא נוב שפתים שלום שלום לרחוק ולקרוב אמר יהוה ורפאתיו׃ 20 והרשעים כים נגרש כי השקט לא יוכל ויגרשו מימיו רפש וטיט׃ 21 אין שלום אמר אלהי לרשעים׃