1 הן עבדי אתמך בו בחירי רצתה נפשי נתתי רוחי עליו משפט לגוים יוציא׃ 2 לא יצעק ולא ישא ולא ישמיע בחוץ קולו׃ 3 קנה רצוץ לא ישבור ופשתה כהה לא יכבנה לאמת יוציא משפט׃ 4 לא יכהה ולא ירוץ עד ישים בארץ משפט ולתורתו איים ייחילו׃
5 כה אמר האל יהוה בורא השמים ונוטיהם רקע הארץ וצאצאיה נתן נשמה לעם עליה ורוח להלכים בה׃ 6 אני יהוה קראתיך בצדק ואחזק בידך ואצרך ואתנך לברית עם לאור גוים׃ 7 לפקח עינים עורות להוציא ממסגר אסיר מבית כלא ישבי חשך׃ 8 אני יהוה הוא שמי וכבודי לאחר לא אתן ותהלתי לפסילים׃ 9 הראשנות הנה באו וחדשות אני מגיד בטרם תצמחנה אשמיע אתכם׃