1 בני תורתי אל תשכח ומצותי יצר לבך׃ 2 כי ארך ימים ושנות חיים ושלום יוסיפו לך׃
3 חסד ואמת אל יעזבך קשרם על גרגרותיך כתבם על לוח לבך׃ 4 ומצא חן ושכל טוב בעיני אלהים ואדם׃
5 בטח אל יהוה בכל לבך ואל בינתך אל תשען׃ 6 בכל דרכיך דעהו והוא יישר ארחתיך׃ 7 אל תהי חכם בעיניך ירא את יהוה וסור מרע׃ 8 רפאות תהי לשרך ושקוי לעצמותיך׃
9 כבד את יהוה מהונך ומראשית כל תבואתך׃ 10 וימלאו אסמיך שבע ותירוש יקביך יפרצו׃
11 מוסר יהוה בני אל תמאס ואל תקץ בתוכחתו׃ 12 כי את אשר יאהב יהוה יוכיח וכאב את בן ירצה׃