Micah 6

The Indictment of the Lord

¹ שמעו נא את אשר יהוה אמר קום ריב את ההרים ותשמענה הגבעות קולך׃ ² שמעו הרים את ריב יהוה והאתנים מסדי ארץ כי ריב ליהוה עם עמו ועם ישראל יתוכח׃

³ עמי מה עשיתי לך ומה הלאתיך ענה בי׃ ⁴ כי העלתיך מארץ מצרים ומבית עבדים פדיתיך ואשלח לפניך את משה אהרן ומרים׃ ⁵ עמי זכר נא מה יעץ בלק מלך מואב ומה ענה אתו בלעם בן בעור מן השטים עד הגלגל למען דעת צדקות יהוה׃

What Does the Lord Require?

⁶ במה אקדם יהוה אכף לאלהי מרום האקדמנו בעולות בעגלים בני שנה׃ ⁷ הירצה יהוה באלפי אילים ברבבות נחלי שמן האתן בכורי פשעי פרי בטני חטאת נפשי׃ ⁸ הגיד לך אדם מה טוב ומה יהוה דורש ממך כי אם עשות משפט ואהבת חסד והצנע לכת עם אלהיך׃

Destruction of the Wicked

⁹ קול יהוה לעיר יקרא ותושיה יראה שמך שמעו מטה ומי יעדה׃ ¹⁰ עוד האש בית רשע אצרות רשע ואיפת רזון זעומה׃ ¹¹ האזכה במאזני רשע ובכיס אבני מרמה׃ ¹² אשר עשיריה מלאו חמס וישביה דברו שקר ולשונם רמיה בפיהם׃ ¹³ וגם אני החליתי הכותך השמם על חטאתך׃ ¹⁴ אתה תאכל ולא תשבע וישחך בקרבך ותסג ולא תפליט ואשר תפלט לחרב אתן׃ ¹⁵ אתה תזרע ולא תקצור אתה תדרך זית ולא תסוך שמן ותירוש ולא תשתה יין׃ ¹⁶ וישתמר חקות עמרי וכל מעשה בית אחאב ותלכו במעצותם למען תתי אתך לשמה וישביה לשרקה וחרפת עמי תשאו׃